Beint á efnisyfirlit síðunnar
25.03.2010

3i kaupir 20% hlutafjár í Refresco

Aukning hlutafjár gerir Refresco kleift að vaxa enn frekar - Núverandi hluthafar halda kjölfestuhlut sínum og styðja vaxtarstefnu Refresco

Eigendur Refresco, eins stærsta drykkjarvöruframleiðanda Evrópu, og alþjóðlega fjárfestingafélagið 3i hafa gert samkomulag um að 3i kaupi nýtt hlutafé í Refresco, sem nemur 20% af heildarhlutafé Refresco.  Verðmæti fjárfestingarinnar nemur 84 milljónum evra, um 14,5 milljörðum íslenskra króna, sem verður að fullu nýtt til að styðja við frekari vöxt Refresco. Núverandi hluthafar, hópur íslenskra fjárfesta undir forystu Stoða og stjórnendur Refresco, verða áfram meirihlutaeigendur og styðja innkomu 3i.

Refresco er nú stærsti framleiðandi Evrópu á sérmerktum (“private-label”) drykkjarvörum, gosdrykkjum og ávaxtasöfum, með starfsemi í 19 verksmiðjum í 8 Evrópulöndum. Vaxtarstefna Refresco miðar að því að styrkja enn frekar leiðandi stöðu fyrirtækisins á Evrópumarkaði með  yfirtökum samhliða innri vexti. 

Þetta er í annað sinn sem 3i fjárfestir í Refresco.  3i var stærsti eigandi Refresco á árunum frá 2003 til 2006, sem voru farsæl rekstrarár og hagnaðist 3i vel á fjárfestingu sinni við sölu í apríl 2006. Stoðir, Kaupþing og Vífilfell keyptu þá 80% hlutafjár Refresco og innleiddu ásamt stjórnendum sóknarstefnu (“buy&build”) um uppbyggingu Refresco með yfirtökum samhliða hagræðingu og innri vexti. Á síðastliðnum þremur árum hafa tekjur og arðsemi Refresco tvöfaldast. Heildarvelta Refresco á árinu 2009 nam um 1,2 milljörðum evra, yfir 200 milljörðum íslenskra króna. Eftir hlutafjáraukninguna sem kynnt var í dag eiga Stoðir, Kaupþing og Vífillfell samtals 62% hlut í Refresco.


Hans Roelofs, forstjóri Refresco: 

„Við erum afar ánægð með hlutafjáraukninguna og endurkomu 3i í hluthafahópinn.  Refresco er ört vaxandi fyrirtæki með metnaðarfull framtíðaráform. Við munum áfram fylgja vaxtarstefnu okkar og treysta enn frekar leiðandi stöðu Refresco í Evrópu með markvissum yfirtökum og áframhaldandi innri vexti. Við vitum að 3i er áreiðanlegur og traustur samstarfsaðili sem mun styðja okkur í að ná markmiðum okkar. ”

Pieter de Jong, framkvæmdastjóri 3i, Benelux: 

„Fjárfesting 3i í Refresco er frábært tækifæri til að styðja við bakið á leiðandi fyrirtæki á sínu sviði í Evrópu og nýta vaxtarmöguleika þess 
til fulls. Við höfum mikla þekkingu á starfsemi Refresco, höfum átt gott samstarf við afar hæfa stjórnendur félagsins, og og höfum mikla trú á framtíð Refresco. Íslensku hluthafarnir hafa unnið frábært starf síðastliðin ár hvað varðar fjárhagslegan stuðning, stefnumótun og rekstur Refresco. Markmið með minnihlutafjárfestingu 3i í Refresco er í fullu samræmi við markmið stjórnenda og hluthafa Refresco.”

Jón Sigurðsson, framkvæmdastjóri Stoða:

„Við fögnum komu 3i inn í hluthafahóp Refresco, enda teljum við 3i afar sterkan og trúverðugan samstarfsaðila. Viðskiptin staðfesta sterka frammistöðu Refresco á undanförnum árum og gera félaginu kleift að sækja enn frekar fram. Stoðir, Kaupþing og Vifilfell verða áfram kjölfestufjárfestar í Refresco og með nýjum, öflugum samstarfsaðila er Refresco í ákjósanlegri stöðu til að halda áfram árangursríkri sóknarstefnu sinni á næstu árum, öllum hluthöfum til hagsbóta.”

Frekari upplýsingar

Sími: 591 4400
Netfang: info@stodir.is