Beint á efnisyfirlit síðunnar
26.03.2010

Hagnaður af rekstri Stoða 1.209 m. kr. á seinni hluta árs 2009

Á aðalfundi Stoða í dag var ársreikningur Stoða fyrir árið 2009 lagður fram. Bókfært verðmæti eigna Stoða þann 31. desember 2009 var 33,5 milljarðar króna og skuldir félagsins, sem allar eru til langs tíma, námu 10 milljörðum króna. Eigið fé Stoða í árslok 2009 nam því 23,5 milljörðum króna og eiginfjárhlutfall félagsins var 70%.

Fjárhagslegri endurskipulagningu Stoða lauk um mitt síðasta ár, samhliða nauðasamningum við kröfuhafa sem í kjölfarið eignuðust allt hlutafé í Stoðum. Í ársreikningi fyrir árið 2009 er bókfærð tekjufærsla vegna eftirgefinna skulda í tengslum við nauðasamninga, og nemur bókfærður hagnaður á árinu 2009 því 212 milljörðum króna. Starfsemi Stoða var með reglubundnum hætti á seinni hluta ársins og nam hagnaður þess tímabils 1.209 milljónum króna.

Helstu eignir Stoða eru 99,9% hlutur í Tryggingamiðstöðinni (TM) og 40% hlutur í evrópska drykkjarvöruframleiðandanum Refresco, en í gær var tilkynnt um kaup fjárfestingafélagsins 3i á 20% hlut í Refresco fyrir 84 milljónir evra. Meðal annarra eigna Stoða má nefna eignarhluti í Royal Unibrew, Nordicom og Inspired Gaming.

Hluthafar Stoða eru nú 109 talsins. Þrír hluthafar, Glitnir, NBI og Arion banki, fara með yfir 10% af atkvæðamagni hlutabréfa.


Frekari upplýsingar veitir:

Júlíus Þorfinnsson
Sími 896 6612
Netfang: julius@stodir.is


Frekari upplýsingar

Sími: 591 4400
Netfang: info@stodir.is