Beint á efnisyfirlit síðunnar
20.11.2012

60 prósent eignarhlutur í TM afhentur kaupendum

Stoðir hf. sömdu í lok júlí sl. um sölu á 60% eignarhlut í Tryggingamiðstöðinni hf. (TM) til hóps lífeyrissjóða og annarra innlendra fjárfesta. Skilyrði kaupsamningsins hafa nú verið uppfyllt og hefur eignarhluturinn verið afhentur gegn staðgreiðslu kaupverðs.

Meðal skilyrða í kaupsamningnum var samþykki Fjármálaeftirlitsins og Samkeppniseftirlitsins og að tilteknar hlutabréfaeignir TM að bókfærðu verðmæti 4,6 milljarðar króna yrðu færð út úr félaginu til móðurfélagsins, Stoða, gegn samsvarandi lækkun hlutabréfa Stoða í TM. Við það lækkaði eigið fé TM miðað við efnahag í lok júní 2012 í 8,4 milljarða króna. Kaupverð 60% eignarhlutarins var 6,7 milljarðar króna og svarar það til þess að virði félagsins í heild, eftir lækkun hlutafjár að verðmæti 4,6 milljarðar, var metið 11,2 milljarðar króna.

Kaupendur eru meðal annars Lífeyrissjóður verzlunarmanna, Sameinaði lífeyrissjóðurinn, Söfnunarsjóður lífeyrisréttinda, Stafir lífeyrissjóður, Lífeyrissjóður starfsmanna sveitarfélaga, Festa lífeyrissjóður, Almenni lífeyrissjóðurinn, Íslenski lífeyrissjóðurinn, Lífeyrissjóður Vestfirðinga, fjárfestar á vegum VÍB – Eignastýringar Íslandsbanka, Virðingar og Auðar Capital auk Sjóðs 10 á vegum Íslandssjóða, Úrvalsbréfa á vegum Landsbréfa og sjóðs á vegum Júpíters rekstrarfélags.

Stoðir eiga 39,9% hlut í TM eftir þessi viðskipti. Stefnt er að skráningu TM á Aðallista NASDAQ OMX Iceland á fyrri hluta næsta árs og í tengslum við skráningu áforma Stoðir að selja eftirstandandi eignarhlut sinn, að hluta til eða öllu leyti, í almennu hlutafjárútboði.

Frekari upplýsingar

Sími: 591 4400
Netfang: info@stodir.is